|
MARTXOA-2003
JOSE ANTONIO AGIRRE FRANCO | Matia Fundazioaren
Zuzendaria
"Donostian, adineko
pertsonek oso foro gutxi dituzte harremanetan
jarri ahal izateko eta pertsona gisa errealizatzeko"
Jose Antonio Agirre Franco Matia
Fundazioko Zuzendaria eta Plan Estrategikoaren
Batzorde Eragileko partaidea da. Donostia,
adinekoen bizitza kalitateari dagokionez,
egoera pribilegiatu batetik abiatu dela uste
du, hiri-inguruneari, paisaiari eta beste
baldintza batzuei esker; baina, bere iritziz,
azken urteetan ez du aurrera egin beste hiri
batzuekin alderatuz gero. Ardatz estrategikoaren
garapenaren alde eta Matiak bultzaturiko Gerontologia
Institutu Teknologikoa finkatzearen alde apustu
egin du.
-Zein uste duzu dela Donostiako gaur
egungo egoera, adinekoei dagokionez?
Donostia hiria paisaia atseginekoa eta erosoa
da; beraz, adinekoak ongizatean bizi direla
bertan pentsa daiteke. Gainera, klima atsegina
du, eta hori ere bizitza kalitate horren aldekoa
da. Zentzu honetan, hiri guztiz egokia da.
Adinekoei begira, ordea, jarduera, parte hartze,
elkarte eta garrantzi sozial eskasa duen hiria
da. Salbuespenak salbuespen, erretiroa hartzen
duen momentuan, pertsona desagertu egiten
da gizarte-eremutik; marginazioa dela esan
daiteke.
-Nola baloratuko zenituzke Donostiaren
alderdi hauek?
> Bizitza kalitatea:
Iritzia ona da; zerbitzuen kalitate-maila
ona da, beste ingurune batzuekin alderatuz
gero.
> GGBBren erretentzio gaitasuna:
nahiko baxua, edo txarra, batez ere galtzear
dauden jarduera-sektore zehatzetan; giza baliabide
gaituen galera sortzen du horrek. Gainera,
horri egoera soziopolitikoa eta gazteentzako
etxebizitzen garestitzea gehitzen bazaio,
egoera nahiko etsigarria da.
> Enpresa proiektu berritzaileak
erakartzea: Momentuz gutxi dira,
eta horrek aurretik esandako giza baliabideen
atxikipen gaitasun txikia eragiten du. Enpresa
proiektu berritzaileak badituzu, giza baliabide
gaituak ondo atxikitzen dituzu. Honetan ekimen
berritzaileak sortzen ari dira, baina oraingoz
ez dira nahikoa. Ardatz estrategikoetako batean,
ordea, hau dela uste da garatzeko lehentasuna
duen alorra.
> Teknologia Berrien onarpen eta
hedapen maila: Gai hauetan oso iragazkortasun
ona dagoela uste dut. Sentiberatasun handia
eta erdi-mailako hiritarraren parte hartze
ona dago alor hauetan.
> Erakundeen, jakintza-zentroen,
enpresarien eta profesionalen arteko harremana:
harreman-maila oso baxua da, industri eremuan
izan ezik; azken honetan, Gobernuaren politika
eta egitasmoen, enpresarien, teknologia zentroen
edota Unibertsitateen artean ere badago harremana.
Baina, gainerakoan, ez dago hartu-emanik,
eta zerbitzuen sektorean are gutxiago.
> Kanpora begira emandako irudia:
Irudi ona ematen da, testuinguru politikoan
izan ezik. Bizitza kalitate oso onaren ikuspegiak
eragiten du pertzepzio positiboa kanpoaldetik.
|