| 2004-ko
abendua
Aquariumak
instalazioak handituko ditu
Euskadiko bigarren museorik bisitatuenak
igogailu panoramiko bat, Urgull mendiaren
ondoan jatetxea izango duen eraikin berri
bat eta kaitik sarrera berri bat izango ditu.
Datorren urtarriletik aurrera Aquariumak
1998an hasitako birmoldaketa osatuko du. Asmo
handiko proiektu bat da eta berrikuntza nagusienen
artean igogailu panoramikoa eta Urgull mendiaren
ondoan jatetxea izango duen eraikin berri
bat egitea daude. Inbertsoa 14,2 milioi eurokoa
da eta Udalak, Diputazioak eta Eusko Jaurlaritzak
ordainduko dute gehiengoa. Museo Ozeanografikoa
ez da lanak dirauten artean itxiko eta erakusgai
dauden 5.000 espezieak ez dira beste toki
batetara eraman behar izango.
Birmoldaketa bi urratsetan egingo da: lehenengoa,
motzena, datorren urtean egingo da eta bigarrena
2006ko hasieran hasi eta 2008ko martxo arte
luzatuko da; azken honetan 1928ko eraikin
zaharra birmoldatuko da baina fatxada mantenduz.
Aldaketa hauekin bisita funtzionalago eta
erakargarriago bat lortu nahi da. Orain denda
dagoen tokian gela batzuk jarriko dira, hauetan
tailer hezitzaileak, bilerak, behin behineko
erakusketak eta hurrengo ikasturtetik aurrera
ematen hasiko diren Itsas Biologiaren edo
Itsas Zientzien Europako Masterreko klaseak
emango dira. Ekintza hauekin guztiekin 500
m2 inguru irabazi eta museoaren antolaketa
funtzionalago bat pentsatu ahal izango da,
urtean 330.000 bisita inguru jasotzen baititu.
Barnealdeko aldaketek Paseo Berriko urbanizazioan
lan garrantzitsuak egin beharra eragingo dute.
Angel de la Hoz arkitektoak azaldu zuenaren
arabera, Apaizaren Paseorako sarbidea birmoldatuko
da eta elbarrientzako igobide bat ere egongo
da. Portutik Paseo Berrira iristeko oztopo
arkitektonikoak ere ezabatu eta Donostiako
badiako bistak izango dituen kristalezko igogailu
panoramiko bat jarriko da.
|